ବାଲେଶ୍ୱର ଉପନିର୍ବାଚନ ନେଇ ବିଜେଡି ଶିବିର ଚଳଚଞ୍ଚଳ
1 min read
ବାଲେଶ୍ୱର : ବାଲେଶ୍ୱର ସଦର ଆସନ ଉପନିର୍ବାଚନକୁ ନେଇ ବିଜେଡି ଶିବିର ଚଳଚଞ୍ଚଳ ହୋଇଉଠିଛି। ଆଜି ଦଳର ସଂଗଠନ ସଂପାଦକ ତଥା ବିଧାୟକ ପ୍ରଣବ ପ୍ରକାଶ ଦାସ (ବବି) ଅଚାନକ ବାଲେଶ୍ବର ଗସ୍ତରେ ଆସି ସର୍କିଟ୍ ହାଉସ୍ଠାରେ ଜିଲ୍ଲା ସଭାପତି ତଥା ପୂର୍ବତନ ସାଂସଦ ରବୀନ୍ଦ୍ର କୁମାର ଜେନା ଏବଂ ପୂର୍ବତନ ସଦର ବିଧାୟକ ଜୀବନପ୍ରଦୀପ ଦାଶଙ୍କ ସହ ରୁଦ୍ଧଦ୍ବାର ଆଲୋଚନା କରିଛନ୍ତି। ଉଭୟ ନେତାଙ୍କ ସହ ପ୍ରଣବ ଘଣ୍ଟାଏରୁ ଅଧିକ ସମୟ ଧରି କରିଥିବା ଏହି ଆଲୋଚନାକୁ ନେଇ ରାଜନୈତିକ ମହଲରେ ଚର୍ଚ୍ଚା ଜୋର୍ ଧରିଛି।
ବିଶେଷ ସୂତ୍ରରୁ ମିଳିଥିବା ଖବର ଅନୁସାରେ, ରବିବାର ମଧ୍ୟାହ୍ନ ପ୍ରାୟ ୧୨ଟା ବେଳେ ପ୍ରଣବ ବାଲେଶ୍ବରରେ ପହଞ୍ଚି ସିଧା ସର୍କିଟ୍ ହାଉସ୍କୁ ଯାଇଥିଲେ। କିଛି ସମୟ ପରେ ସେଠାରେ ପୂର୍ବତନ ସାଂସଦ ଶ୍ରୀ ଜେନା ପହଞ୍ଚିଥିଲେ। ଦୁହେଁ ଦୀର୍ଘ ସମୟ ଧରି ଆଲୋଚନା କରିବା ପରେ ପୂର୍ବତନ ବିଧାୟକ ଜୀବନପ୍ରଦୀପ ଦାଶ ସେଠାରେ ପହଞ୍ଚିଥିଲେ। ତିନି ନେତାଙ୍କ ମଧ୍ୟରେ ଅପରାହ୍ଣ ୩ଟାରୁ ୪ଟା ପର୍ଯ୍ୟନ୍ତ ଆଲୋଚନା ହୋଇଥିଲା। ଏହା ପରେ ସମସ୍ତେ ବାହାରକୁ ଆସିଥିଲେ ଏବଂ ପ୍ରଣବ ଗାଡ଼ିରେ ବସି ସେଠାରୁ ଚାଲି ଯାଇଥିଲେ। ସଦର ଉପନିର୍ବାଚନକୁ ନେଇ ଆଶାୟୀମାନଙ୍କ ମଧ୍ୟରେ ଅନ୍ତଃକନ୍ଦଳ ଲାଗି ରହିଥିବା ବେଳେ ପ୍ରଣବଙ୍କ ଏହି ରୁଦ୍ଧଦ୍ବାର ଆଲୋଚନା ରାଜନୈତିକ ମହଲରେ ଚର୍ଚ୍ଚାର ବିଷୟ ପାଲଟିଛି।
