ବେକାବୁ ସାଇବର ଅପରାଧ, ଅସହାୟ କ୍ରାଇମ୍ବ୍ରାଞ୍ଚ
1 min read
ଭୁବନେଶ୍ୱର : ଦିନକୁ ଦିନ ସାଇବର ଅପରାଧ ବୃଦ୍ଧି ପାଇବାରେ ଲାଗିଛି। କିନ୍ତୁ ଅସହାୟ ହୋଇପଡ଼ିଛି କ୍ରାଇମ୍ବ୍ରାଞ୍ଚ। ସାଇବର ଅପରାଧ ସାମ୍ରାଜ୍ୟର ବୃଦ୍ଧିର ବେଗଠାରୁ ବହୁ ପଛରେ ପଡ଼ିଛି କ୍ରାଇମ୍ବ୍ରାଞ୍ଚ। କହିବାକୁ ଗଲେ, ସାଇବର ଅପରାଧୀମାନେ କ୍ରାଇମ୍ବ୍ରାଞ୍ଚ ଆଖିରେ ଆଙ୍ଗୁଠି ଗେଞ୍ଜି ଲୋକଙ୍କୁ ଲୁଟି ଚାଲିଛନ୍ତି। ପ୍ରତ୍ୟେକ ଦିନ ସାଇବର ଅପରାଧୀମାନେ ନୂଆ ନୂଆ ତରିକାରେ ଲୁଟ୍ କରି ଚାଲିଛନ୍ତି। ଆଖି ପିଛୁଳାକେ ଆକାଉଣ୍ଟରୁ ଟଙ୍କା ଖାଲି କରି ଦେଉଛନ୍ତି। ଏବେ ବିନା ଓଟିପିରେ ଆକାଉଣ୍ଟରୁ ଟଙ୍କା ଲୁଟ୍ ହେବା ଘଟଣା ପଦାକୁ ଆସିଛି। ଖାଲି ସାଧାରଣ ଲୋକ ନୁହନ୍ତି, ଆଇପିଏସ୍ ଅଫିସର, ଆଇଏଏସ୍ ଅଫିସର, ଡାକ୍ତର, ଇଞ୍ଜିନିୟରଙ୍କ ଭଳି ଉଚ୍ଚ ଶିକ୍ଷିତ ବ୍ୟକ୍ତିମାନେ ମଧ୍ୟ ସାଇବର ଅପରାଧୀଙ୍କ ଜାଲରେ ପଡ଼ିଯାଉଛନ୍ତି। ମହାମାରୀ କରୋନା ପାଇଁ ଜାରି ହୋଇଥିବା ଲକ୍ଡାଉନ କାଳରେ ସାଇବର ଅପରାଧୀମାନେ ବେଶ୍ ସକ୍ରିୟ ହୋଇ ଲୁଟି ଚାଲିଥିଲେ ବି କ୍ରାଇମବ୍ରାଞ୍ଚ ଗୋଟିଏ ମାମଲାର ସମାଧାନ କରିବାରେ ସଫଳ ହୋଇନାହିଁ। ତେଣୁ କ୍ରାଇମ୍ବ୍ରାଞ୍ଚର ଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ଫଳରେ ଧୀରେ ଧୀରେ କ୍ରାଇମ୍ବ୍ରାଞ୍ଚ ଉପରୁ ସାଧାରଣ ଲୋକଙ୍କ ଭରସା ତୁଟିବାରେ ଲାଗିଛି।
ଚଳିତବର୍ଷ ସାଇବର ଅପରାଧ ମାମଲା ସଂଖ୍ୟା ସବୁ ରେକର୍ଡକୁ ଟପିଯିବ ବୋଲି ଆକଳନ କରାଯାଉଛି। ୨୦୧୮ରେ ୮୪୩ଟି ମାମଲା ରୁଜୁ ହୋଇଥିବା ବେଳେ ୨୦୧୯ରେ ମାମଲା ସଂଖ୍ୟା ଥିଲା ୧୪୮୫। ୨୦୧୮ ତୁଳନାରେ ୨୦୧୯ରେ ୭୬ ପ୍ରତିଶତ ମାମଲା ବୃଦ୍ଧି ପାଇଥିଲା। ଚଳିତବର୍ଷ ଜାନୁଆରି ୧ରୁ ଜୁଲାଇ ୩୧ ପର୍ଯ୍ୟନ୍ତ ୯୪୨ଟି ମାମଲା ରୁଜୁ ହୋଇଥିଲା। ୨୦୨୦ରେ ମାମଲା ସଂଖ୍ୟା ୨ହଜାର ଟପିଯିବ ବୋଲି କୁହାଯାଉଛି।
